कधी वाटते

कधी वाटते मी कृष्ण मेघ व्हावे

पाऊस होऊनी बरसत रहावे

कधी कवीच्या त्या लेखणीतून

कविता होऊन बाहेर रिसावे

 

कधी वाटते मी वारा व्हावे

बेभान होऊन सुसाट वाहावे

मंद तुझा मी स्पर्शुन गंध

धुंद होऊन परत फिरावे

 

कधी वाटते मी स्वप्न बनावे

आणि अवचित मी तुला पडावे

स्वप्नातुन तुला येताच ग जाग

अंगावर तुझ्या रोमांच शहारावे

 

कधी वाटते मी चांदणे व्हावे

चकोर होऊन तु मला प्यावे

तृष्णेने न कोणत्या च उरावे

जे वांछीले ,ते कैवल्य मिळावे

 

शुक्रवार, २२/३/२०२४ , १२:५५ PM
अजय सरदेसाई (मेघ)