चित चोर इस फिल्म के उसी गाने से प्रेरित।
डोळ्यांत आसवांना वाहुदे ना,
आसवां वाटे दुखास जाऊदे ना।
स्मित थोडं ओठांवर राहुदे ना,
डोळ्यांना ही तेव्हा हसुदे ना।
छोटेच जरी आयुष्य असुदे ना,
जगणं मात्र मोठेच जगूदे ना।
जरी वाट कठिण, निबिड अरण्याची,
वाटेत कजव्यांचा उजेड असूदे ना।
तू नी मी आहोत अनोळखी,
ठिक आहे, ओळख करून घेऊ ना।
जाणतो, डोक्यावर छत नाही आपल्या,
आभाळ आहे, तारकांचे छत करू ना।
तुझे नी माझे सूर मिसळले एकसुरात,
सुरावटीत त्या गाणं गाऊ दे ना।
तू गुलाब, मी सुगंध तुझा सखे,
प्रेमही आपले असेच असूदे ना।
गुरुवार, १२/३/२६, ५:५० PM
अजय सरदेसाई – मेघ
दे पुन्हा एकदा हात हातात,
चल पुन्हा जाऊ त्या रानात।
पुन्हा ऐकू चल ते वनाचे गाणे,
चल ना सखे, सोड सारे बहाणे।
रानवारा झाडांत सळसळला,
भृंग कमळांत जाऊन बसला।
पारवा टिवटिवला दूर कोठे,
आवाज त्याचा बनांत साठे।
चल रानमेवा खुणावतो अजून,
चिंचा-बोरी पाहती वाट अजून।
चल बसू या तलावाच्या काठावर,
दगडांनी उठवू तरंग त्या पाण्यावर।
तु झालीस लेकुरवाळी, मी गृहस्थचारी,
वयाने का आणली मैत्रीत ही लाचारी?
चल देऊ झुगारून वयाचे बंधन,
चल पुन्हा घेऊ ते मैत्रीचे आंदण।
चल बसू पुन्हा शाळेच्या त्या बाकावर,
घंटा होताच पळू पुन्हा रानावर।
उरली आयुष्यात वेळ खूप थोडी,
चल चाखू पुन्हा रानमेव्याची गोडी।
सखे, दे पुन्हा एकदा हात हातात,
चल ना पुन्हा जाऊ त्या रानात।
