कुर्निसात

 

उगवत्या सूर्यास माझा कुर्निसात,
त्यास सहस्र किरणे नि बारा हात।

वाहत्या वार्यास माझा कुर्निसात,
शांत वाहतो जरी वादळ हृदयात।

सागराच्या प्रवाहास माझा कुर्निसात,
वर जरी उथळ, तरी शांत आत।

अढळ डोंगरास माझा कुर्निसात,
उंचच उंच, तरी अहंकाररहित।

मावळत्या चंद्रास माझा कुर्निसात,
शीतल उजेडात विरते रात।

दूरवरी तार्‍यांस माझा कुर्निसात,
अंधारातही दाखवती वाट।

दशदिशांस माझा कुर्निसात,
नित्य नवे आणती दूरची वृत्त।

 

शुक्रवार, १६/१/२६ , ११:११ PM

अजय सरदेसाई -मेघ