मी गीत, तू तराणा...

मी गीत,
तू तराणा हो ना.
मी गोष्ट,
तू ती सांगना.
अपूर्ण होते मी रे,
तू सुचलास,
आणि मी पूर्ण झाले ना…


कुणीच नव्हतं ऐकणारं,
तेव्हा तू ऐकलंस मला.
शब्द नव्हते ओठांवर,
तरी डोळ्यांत वाचलंस मला.
कितीदा रडले लपून मी,
कुणालाच कळलं नाही.
तू फक्त हात धरलास,
आणि दुःखच उरलं नाही.


कधी कधी एक भीती वाटते,
सुख इतकं मिळालंय म्हणून.
भीती वाटते, कुणी तुला हिरावेल म्हणून,
तू नसलास तर, तुझ्या विना मी मरेन?
तू म्हणतोस, "वेडी आहेस",
मी हसते, डोळे भरतात.
का रे, हरवायला घाबरतात?


मी गीत,
तू तराणा हो ना.
मी गोष्ट,
तू ती सांगना.
अपूर्ण होते मी रे,
तू सुचलास,
आणि मी पूर्ण झाले ना…


उद्या कदाचित मी नसेन,
माझं गाणं तू गुणगुणशील?
एका ओळीवर थांबून,
हळूच डोळे पुसशील?
तेव्हा फक्त एवढं कर,
मुखडा पुन्हा म्हण रे.
मी तिथेच असेन जवळ,
डोळे मिटून ऐक रे.


काय सांगू तुला आता,
शब्द सारे मूकच होतात.
तुझ्या माझ्या प्रेमकथेत
फक्त डोळेच बोलू लागतात.
मी तुझ्या नि तू माझ्या डोळ्यात पाहा,
तू कुठेही जा रे, पण माझ्या डोळ्यात रहा.


मी गीत,
तू तराणा हो ना.
मी गोष्ट,
तू ती सांगना.
अपूर्ण होते मी रे,
तू सुचलास,
आणि मी पूर्ण झाले ना…

शुक्रवार, २३/१०/२०२६ , ७:०० PM

अजय सरदेसाई -मेघ