जुळल्या आपल्या रेशीमगाठी जाणता अजाणता ।
वाटेत भेटलो अवचित आपण जाणता अजाणता ।।
मनःकोषात जे लपुन ठेवले तुझ्या नी सर्वांपासुनी ।
उघड झाले गुज ते आता जाणता अजाणता ।।
हृदयांत जे आळवित होतो तुझे प्रेम गीत ।
ओठांवर तो यमन आला जाणता अजाणता ।।
रोज तुला दुरून न्याहाळून दिवस सरत होते ।
स्वप्नमार्गे हृदयांत शिरलीस जाणता अजाणता ।।
मधुगंध तुझा श्वासात दाटला बेधुंद झाली गात्रे ।
हळुवार मनांत मोरपंख फिरला जाणता अजाणता ।।
शुक्रवार २३/२/२४ , ११:५० PM
अजय सरदेसाई (मेघ)
