ग्रह नी नक्षत्र - ( वेगळा दृष्टिकोन)

कुठल्या ग्रहाने लिहिले हे भाग्य माझे,
मी स्वतःच ठरवतो मी मार्ग माझे।।

शनि बसो वा राहू येवो डोक्यावर,
थांबणार नाही कधी पाऊल माझे।।

तारे मोजत बसले ते रात्रभर,
मी मात्र पेटवत राहिलो दिवे माझे।।

नक्षत्रांनी आखल्या रेषा आकाशात,
मातीत रुजवत राहिलो बीज माझे।।

म्हणे वक्री शनि, म्हणे अस्त शुक्र,
तरीही हात सोडेना करणे कष्ट माझे।।

ग्रहांची भाषा कळेना मला कधी,
पण कळतात मला श्वास आणि ध्यास माझे।।

दैव जरी असेल लिहिलेले कुणी,
शाई मात्र असेल घामाचे थेंब माझे।।

शुक्रवार, १५/५/२६ , १२:३५ PM
अजय सरदेसाई -मेघ